حرام الهجر

كفايه ، حرام الهجر يا حلوة الحلــــوين
تعـــبان قلبي و ما عــــاد العـــمر يكفيني
راح الربيـــع و بــــــدي بالثرثرة ‏تشرين
‏تعـرت غصوني و ما خلا وراق ع التيني

كنتي إن طلبتي الثلــج اطلـع على صنين
تا الثلـــــج يروي ضماكي و مي ترويني
وكنتي إن بردتي و غـزاك البرد بكوانين
تقــــولي ع جمر الهـوى الدفـيان دفـيني

وزهو الربيع اغترب عن وردة النسرين
وما كان منو وقـت يعطيكي و يعطــــيني
و قعــــدت فكّر في هــم العمر و التكوين
و أرزل العـمر جــــاييــكي و جــــــاييني

تا صار عمري أنا تــــلاتي مع تــــلاتين
و كترت بعقـــلي الهواجس يا تقــبريـني
والشيب واعد يجي من بعد عشر سـنين
و دَوِّر ع صبغـة شـــعر حتى تـــواسيني

شــفت حالي صرت ما بين(جيم و سين)
اجمع و اطرح تا لاقي حساب يـــرضيني
ما كنت صدق طــوانا العمر حين و حين
و ما عـود اسمع إن حكيتــك أو حكيتيني

و جمر القلوب انطـفا تغطى برماد سنين
و الروح منو انتهت تا البـــرد ينهــــيني
ما كنت افهم شو معنى العجـز بالسبعين
و شو مستحيل الصبا يسترجــــع سنيني

و يمكن مع العـمر نحنا نصير خرفــانـين
و كتر الهواجس يا عــــمري ما بيلهيني
ع العمر كوني معي و ع الضيم متحــدين
و ما بخاف انــك يا روحي ما تنصفـــيني

بالعـــــــمر أنـتي و أنا للحــب منـــذورين
تا النــذر نوفي و ع وفي النــــذر عينيني
انتي كــــــواكي الهجر في جمرتو تخمين
و بنار هجرك يا روحي ليش تــــــــكويني

******